देवगड / प्रतिनिधी
देवगड- जामसंडे नगरपंचायतीची गुरुवारी झालेली सर्वसाधारण सभा ठेकेदारांच्या विषयावरून गाजली
देवगड- जामसंडे नगर पंचायतीची गुरुवारी झालेली सर्वसाधारण सभा ठेकेदारांच्या विषयावरून गाजली. जनतेच्या सोयीसुविधांसाठी शासनाकडून मोठ्या प्रमाणात निधी मंजूर केला जातो. मात्र ठेकेदाराकडून वेळेत कामे पूर्ण होत नसतानाही त्या कामांना वाढीव दिवसांचा कालावधी दिला जातो. न. पं. ला सक्षम ठेकेदार का मिळत नाही ? न. पं. प्रशासन ठेकेदारांच्या अजून किती आहारी जाणार आहे ? असा सवाल नगरसेवक नितीन बांदेकर यांनी उपस्थित केला. मनमानीपणे सभागृहात कोणतेही बेकायदेशीर निर्णय घेण्यात येऊन त्यावर कोणत्याही प्रकारचे चुकीचे ठराव घेतले गेले तर प्रशासनाची गय करणार नाही, असेही त्यांनी ठणकावले.
देवगड- जामसंडे न. पं. ची सर्वसाधारण सभा न. पं. सभागृहात नगराध्यक्षा साक्षी प्रभू यांच्या अध्यक्षतेखाली पार पडली. व्यासपीठावर न. पं. बांधकाम समिती सभापती शरद ठुकरुल,आरोग्य व स्वच्छता सभापती आद्या गुमास्ते , प्रशासकीय अधिकारी लक्ष्मण लोंढे, नगर अभियंता विवेक खोत आदी उपस्थित होते. न. पं. हद्दीतील नळग्राहकांना २०१८ च्या उपविधीनुसार नळकनेक्शन देणे आवश्यक असून कुणाचेही नळकनेक्शन बंद करण्यात येऊ नये. ठराव घेऊन तात्काळ नळधारकांना नोटीस पाठविणे अयोग्य असून त्यावर चर्चा होणे महत्वाचे आहे. सर्वसाधारण सभेत मांडण्यात येणारे विषय इतिवृत्तात नमूद होत नसून केलेल्या सूचनांची दखल घेतली जात नाही. प्रसंगी सभागृहात चर्चा होत असताना आवश्यक ती ठोस कार्यवाही माहिती प्रशासनामार्फत सभागृहात दिली जात नसल्याने नगरसेवक नितीन बांदेकर यांनी तीव्र नाराजी व्यक्त केली.
