कणकवलीतील अवैध धंद्यावर कारवाई करा ; पोलीस निरीक्षकांकडे भाजपच्या शिष्टमंडळाची मागणी

कणकवली दि ३० (प्रतिनिधी)

कणकवलीतील अवैध धंद्यावर कारवाई करा ; पोलीस निरीक्षकांकडे भाजपच्या शिष्टमंडळाची मागणी

कणकवली तालुक्यात अवैध धंद्यांना मोठ्या प्रमाणात ऊत आला आहे. अवैध दारू, अंमली पदार्थांची तालुक्यात ठिकठिकाणी खुलेआम विक्री सुरु आहे. अवैधदारु व अंमली पदार्थांची खुलेआम विक्री रोखण्यासाठी पोलिसांकडून कोणतीही कारवाई होताना दिसत नाही. अमंलीपदार्थांची विक्री गावागावांमध्ये खुलेआम सुरु आहे. याबाबत पोलिसांनी कडक पाऊले उचलावीत, अशी भाजपच्या शिष्टमंडळाने माजी जि. प. अध्यक्ष संदेश उर्फ गोट्या सावंत यांच्या नेतृत्वाखाली पोलीस निरीक्षक समशेर तडवी यांच्याकडे निवेदनाद्वारे मागणी केली.

यावेळी भाजप तालुकाध्यक्ष मिलिंद मेस्त्री, युवा मोर्चा जिल्हाध्यक्ष तथा कलमठ सरपंच संदीप मेस्त्री, उपसरपंच स्वप्नील चिंदरकर, कळसुली सरपंच सचिन पारधिये, वागदे सरपंच संदीप सावंत, साकेडी उपसरपंच प्रज्वल वर्दम, माजी नगरसेवक शिशिर परूळेकर, युवा मोर्चा पदाधिकारी संतोष उर्फ पप्पू पुजारे, सुभाष मालंडकर, समीर प्रभूगांवकर, विजय चिंदरकर, सिद्धेश तळगांवकर, बाबू घाडीगांवकर, नितीन राणे, लवू परब, शिवा राणे, महेश तेली, आशिष राणे, अभय गांवकर, सागर पवार आदी उपस्थित होते.

निवेदनात म्हटले आहे की, तालुक्यात ठिकठिकाणी अवैधदारु व अंमली पदार्थांची राजरोसपणे विक्री सुरु आहे.पोलीस केवळ आकडेवारी दाखवण्यासाठी एखाद दुसरी कारवाई करत असल्याचे दिसून येत आहे. अवैध धंद्यांबरोबरच मटका, जुगार, ऑनलाईन लॉटरी असे सर्वच प्रकार राजरोसपणे सुरु असतानाही पोलीस यंत्रणा त्याकडे डोळेझाक करीत आहे. अवैध धंद्यांमुळे गैरप्रकार वाढण्याची शक्यता असून पोलिसांनी अवैध धंदे रोखण्यासाठी तातडीने कडक पावले उचलावीत, अन्यथा आम्हाला लोकशाही मार्गाने आंदोलनाची पुढील दिशा ठरवावी लागेल, असा इशारा देण्यात आला. अवैध दारू व अमंलीपदार्थ विक्री करणाऱ्यांकडे पोलीस कधीच दुर्लक्ष करत नाहीत. कुठूनही माहिती मिळाली की आम्ही कारवाई करतो. तुम्ही सुद्धा माहिती दिली तर कारवाई केली जाईल, असे तडवी यांनी सांगितले.