पंढरपूर : “जय जय पांडुरंग हरी” च्या गजरात वारकऱ्यांचे जथे पंढरपूरच्या दिशेने येत आहेत, निमित्त आहे माघी एकादशी..! माघी एकादशीच्या सोहळ्यासाठी सुमारे चार लाखाहून अधिक भावीक पंढरपुरात दाखल झाले आहेत. टाळ मृदंगाच्या विठ्ठल नामाच्या गजरात अवघी पंढरी नगरी दुमदुमून गेली आहे.
माघी एकादशीच्या सोहळ्याची सुरुवात विठ्ठल मंदिरात पहाटेच्या नित्यमहापूजेने करण्यात आली. मंदिरे समितीच्या सदस्या शकुंतला नडगीरे यांच्या हस्ते विठ्ठलाची नित्यमहापूजा संपन्न झाली. विठ्ठलाच्या आरतीनंतर एकादशीच्या सोहळ्यात सुरुवात झाली.
एकादशीच्या निमित्ताने संपूर्ण मंदिरास झेंडूच्या फुलांची आकर्षक सजावट करण्यात आली होती.
तर परंपरेप्रमाणे विठ्ठल दर्शन, विठ्ठलाचे कळस दर्शन, चंद्रभागास्नान, नगर प्रदक्षिणा करण्यास भाविकांनी पहाटेपासूनच सुरुवात केली होती.
या एकादशीच्या सोहळ्यासाठी कोकण , बेळगाव ,कोल्हापूर, विदर्भ, मराठवाडा यासह कर्नाटक व आंध्र प्रदेश येथूनही भाविक पंढरपुरात दाखल झाले आहेत . पदस्पर्श दर्शन रांग पाच किलोमीटर पेक्षा लांब गेल्याने विठ्ठल दर्शनासाठी साधारण सहा ते सात तासांचा कालावधी लागत आहे. लाडक्या विठू माऊलीच्या भक्तीरसात संपूर्ण पंढरपूर नगरी तल्लीन झाली आहे.
