वैभववाडी (तुषार शिंगाडे)
सिंधुदुर्ग जिल्ह्यातील ज्येष्ठ रिक्षाचालकांचा मान्यवरांच्या हस्ते भव्य सत्कार
रिक्षा व्यावसायिक हा समाजातील एक महत्त्वाचा घटक समजला जातो. तो प्रत्येक वेळी मदतीला, हाकेला धावून येत असतो. सैफ अली खानला देखील उपचारासाठी पहिला रिक्षाचालकच धावून आला आणि त्यानेच हॉस्पिटलमध्ये दाखल केले. नंतर त्याच्यावरती उपचार सुरू करण्यात आले होते. वेळप्रसंगी रिक्षाचालक पहिल्यांदा धावून येतो व प्रवाशांचे किंवा रुग्णाचे प्राण वाचवण्यासाठी मदत करतो असे गौरवोद्गार जिल्हा विशेष शाखा सिंधुदुर्गचे पोलीस निरीक्षक सचिन हुंदळेकर यांनी केले.
तसेच सिंधुदुर्ग ख्रिश्चन शांतता समितीचे अध्यक्ष श्री आनंद चौगुले यांनी, जसे डॉक्टर,सैनिक व पोलीस चोवीस तास ड्युटीवर असतात तसेच रिक्षाचालक देखील चोवीस तास आपल्या कामावर रुजू असतात कधीकधी मध्यरात्री तर कधीकधी जेवणाच्या ताटावरुन उठून जाऊन प्रवाशांना सेवा द्यावी लागते असे बोलून रिक्षा चालकांना उत्तेजन दिले.
जेम्स महाराष्ट्र, सिंधुदुर्ग ख्रिश्चन शांतता समिती, ह्यूमन राईट असोसिएशन फॉर प्रोटेक्शन, कोकण विभाग रिक्षा टॅक्सी महासंघ, कणकवली रिक्षा स्टॅन्ड क्रमांक एक, यांच्या संयुक्त विद्यमाने हा कार्यक्रम वागदे येथील गोपूरी आश्रमाच्या सभागृहात आयोजित करण्यात आला होता.याप्रसंगी प्रमुख पाहुणे जेम्स महाराष्ट्र झोनचे अध्यक्ष संजय पन्हाळकर, जेम्स कोकण विभागाचे श्री. अमित पोवार, सिंधुदुर्ग ख्रिश्चन शांतता समिती चे अध्यक्ष श्री. आनंद चौगुले व सचिन हुंदळेकर प्रमुख पाहुणे म्हणून बोलत होते.
या कार्यक्रमाच्या अध्यक्षस्थानी मोटर वाहन निरीक्षक सचिन पोलादे, तर प्रमुख पाहुण सहाय्यक मोटर वाहन निरीक्षक पराग मातोंडकर, ह्यूमन राईट असोसिएशन फॉर प्रोटेक्शनचे कोकण विभागीय अध्यक्ष तथा कोकण विभाग रिक्षा टॅक्सी महासंघाचे कार्याध्यक्ष संतोष नाईक, कोकण विभाग रिक्षा टॅक्सी महासंघाचे सहसचिव सुधीर पराडकर, ह्यूमन राईट असोसिएशन प्रोटेक्शनचे जिल्हाध्यक्ष सुधीर धुरी उपस्थित होते.
रिक्षा व्यवसाय करते वेळी गाडीची सर्व कागदपत्रे मुदतीत नूतनी करून ठेवावीत तसेच रिक्षा व्यावसायिकांनी प्रवाशांची सौजन्याने वागावे. व्यसनापासून दूर राहावे असे आवाहन सचिन पोलादे यांनी केले.यावेळी सर्व मान्यवरांनी आयोजकांचे कौतुक केले.तसेच असे कार्यक्रम होणे गरजेचे आहे असे म्हणाले, तसेच उपस्थित सर्व ज्येष्ठ रिक्षाचालकांचा सन्मान चिन्ह देऊन सन्मान करण्यात आला व रिक्षाचालकांचे अभिनंदन केले.
