सिंधुदुर्गवासियांनी अनुभवली नौदलाची ताकद.!

युद्धनौका व हेलिकॉप्टरच्या कसरती –

• नौदलाचे मरीन कमांडो पॅराशूटमधून खाली उतरताच प्रात्यक्षिकांना सुरुवात.
• आकाशात तेजस, डॉर्निअर, मिग -२९ के आदी विमानांना कसरती केल्या.
• समुद्रात तयार केलेली शत्रूचा चौकी बॉम्बच्या साहाय्याने उद्ध्वस्त करून मरीन कमांडोंनी क्षमता दाखवून दिली.
• युद्धनौकांवरून होणारे हल्ले, शत्रूच्या हल्ल्याचा सामना करणे, समुद्री चाचांवर कमांडो हल्ला करणे, समुद्री बचाव, हेलिकॉप्टर कसरती अशा विविध प्रात्यक्षिकांचे सादरीकरण
• देवबाग येथील खोल समुद्रातील ‘आयएनएस विक्रमादित्य’ या विमानवाहू युद्धनोकेवरून काही लढाऊ विमाने समुद्रातून आकाशात झेपावत होती. कसरती पार पडल्यानंतर ही विमाने ‘विक्रमादित्य’वर पुन्हा परतली.
• मदतीची वाट पाहणाऱ्या मच्छीमार आणि सैनिकांना धनुष हेलिकॉप्टरमध्ये हवेतल्या हवेत ‘एअरलिफ्ट’ करण्यात आले.

तारकर्ली नौदलमय –

कायम गजबजलेला मालवण, तारकर्लीचा समुद्रकिनारा आज चिडीचूप आणि नौदलमय झाल्याचे दृश्य आज दिसले. मुंगीही शिरू शकणार नाही, असा बंदोबस्त शहर परिसरात होता. मालवण, तारकर्ली, देवबाग या परिसरात हॉटेल, दुकाने बंद होती. रस्त्यावर पोलिस आणि नौदलाचे कर्मचारी, अधिकारी सोडून कोणीच दिसत नव्हते. नौदलाच्या साथीला राज्यभरातील पोलीस बळ दाखल झाले होते. मुख्य कार्यक्रमावर नौदलाचे पूर्ण नियंत्रण होते.

हजारोंची गर्दी –

दांडी ते देवबागपर्यंतच्या किनारपट्टीवर प्रात्यक्षिके पाहण्यास नागरिकांनी गर्दी केली होती. त्याने संपूर्ण किनारपट्टी गजबजून गेली होती. सुरक्षेच्या करणास्तव ‘एमटीडीसी’ येथील मुख्य कार्यक्रमाच्या ठिकाणी जाण्यास नागरिकांना बंदी होती.

लक्षवेधी रोषणाई –

कार्यक्रमात सूर्यास्तावेळी राष्ट्रगीताची व ‘सारे जहासे अच्छा हिंदोस्ता हमारा’ या गीताचीही धून वाजविली. त्यानंतर समुद्रात युद्ध नौकांवरील सुरू झालेली रोषणाई आकर्षणाचा केंद्रबिंदू ठरली. तसेच किल्ले सिंधुदुर्गावर लेसर रोषणाई केली होती.