कणकवली (प्रतिनिधी)
दारूच्या नशेमध्ये चक्क पोटच्या गोळ्यानेच आपल्या आईच्या खून केल्याची घटना कणकवली तालुक्यातील वारगाव सोरफ सुतारवाडी येथे घडली.
बुधवारी रात्री ११:३० वा.च्या सुमारास राहत्या घरी घडलेल्या या घटनेत आई प्रभावती रामचंद्र सोरफ ८० या जागीच मृत्युमुखी पडल्या. याबाबत पोलिसांनी घटनास्थळी तात्काळ धाव घेऊन मुलगा रवींद्र रामचंद्र सोरफ (४५) याला ताब्यात घेतले आहे. कणकवली पोलीस ठाण्यात त्याच्यावर गुन्हा दाखल करण्यात आला आहे.
मिळालेल्या माहितीनुसार आरोपी रवींद्र याला दारूचे व्यसन होते. सोरफ कुटुंबीय वारगाव सोरफ सुतारवाडी येथील एका घरात राहत असून या घरांमध्ये पाच बिऱ्हाडे आहेत. बुधवारी रात्रीच्या सुमारास प्रभावती व मुलगा रवींद्र यांच्यात काही कारणावरून वाद झाले.
त्यातून संतप्त झालेल्या रवींद्र यांनी थेट धारधार कोयत्याने आईच्या डोक्यावर आणि ठिकठिकाणी वार केले.आणि रवींद्र याने रक्तबंबाळ स्थितीतील आईला तसेच ओढत ओढत घराच्या हॉलमध्ये आणले. अवघ्या काही क्षणांमध्ये घडलेल्या प्रकारामुळे कुटुंबीय हादरून गेले.
दरम्यान या घटनेची माहिती कणकवली पोलिसांना मिळताच कणकवली पोलीस घटनास्थळी दाखल झाले.पाहणीअंती प्रभावती यांच्या जागीच मृत्यू झाला होता. त्यांच्या शरीरावर ठिकठिकाणी कोयत्याचे गंभीर वार होते. अखेर पोलिसांनी संशयित रवींद्र याला ताब्यात घेऊन कणकवली पोलीस ठाण्यात आणले.
पोलिसांनी त्याची कसून चौकशी केल्यानंतर हा सर्व धक्कादायक प्रकार उघडकीस आला. कणकवली पोलिसांनी मुलगा रवींद्र याच्यावर गुन्हा दाखल केला आहे. दारूच्या नशेत जन्मदात्या आईचाच मारहाण करून तिचा खून केला. या प्रकारामुळे वारगाव परिसरात खळबळ उडाली आहे.
