सावंतवाडी (प्रतिनिधी)
महायुतीतील संघटीत एकजुटीमुळे माझा विजय निश्चित – मंत्री दीपक केसरकर
विधानसभा निवडणुकीत सर्वांनी एकजुटीने व एकदिलाने प्रचार करण्यासाठी एकत्रित नियोजन करण्यासंदर्भात आज महायुतीच्या पदाधिकाऱ्यांची बैठक सावंतवाडी येथे पार पडली. महायुतीच्या उपस्थित सर्वच पदाधिकारी व कार्यकर्त्यांना त्या संदर्भात सूचना करण्यात आल्या आहेत. उद्या शुक्रवारी महायुतीच्या प्रमुख पदाधिकाऱ्यांची पालकमंत्र्यांसोबत पुन्हा बैठक होणार आहे. त्यानंतर सर्वच पदाधिकारी व कार्यकर्ते अधिक जोमाने कामाला लागतील, असा विश्वास देखील महायुतीचे उमेदवार दीपक केसरकर यांनी यावेळी व्यक्त केला.
विधानसभा निवडणुकीच्या पार्श्वभूमीवर महायुतीतील सर्व पक्षांच्या पदाधिकारी, कार्यकर्ते, सरपंच, उपसरपंच यांची समन्वयाची बैठक पार पडली. या बैठकीला पालकमंत्री रवींद्र चव्हाण, शालेय शिक्षण मंत्री दीपक केसरकर व कणकवलीचे आमदार नितेश राणे यांनी मार्गदर्शन करीत पदाधिकारी व कार्यकर्त्यांना आगामी निवडणुकीच्या प्रचारासंदर्भात सूचना दिल्या.
दरम्यान,विधानसभा निवडणुकीच्या पार्श्वभूमीवर महायुतीचे काही कार्यकर्ते अन्य उमेदवारांसाठी काम करीत असल्याचे निदर्शनास आले. अशा पदाधिकारी व कार्यकर्त्यांची नाराजी दूर करण्यात आली. त्यांचे असलेले गैरसमज दूर करण्यात आल्यानंतर सर्वांनीच एक दिलाने काम करण्याचा निश्चय केला आहे. त्यामुळे महायुतीच्या या संघटित ताकदीमुळे माझा विजय निश्चित आहे, असा विश्वास सावंतवाडी विधानसभा मतदारसंघाचे महायुतीचे उमेदवार शालेय शिक्षण मंत्री दीपक केसरकर यांनी व्यक्त केला.
यावेळी भाजपचे जिल्हाध्यक्ष प्रभाकर सावंत, भाजपचे युवा मोर्चा प्रदेश उपाध्यक्ष लखमराजे भोसले, शिवसेना जिल्हाप्रमुख अशोक दळवी,शिवसेनेचे जिल्हा संघटक संजू परब,भाजपचे जिल्हा सरचिटणीस महेश सारंग, महिला जिल्हाध्यक्षा ॲड. नीता कविटकर, माजी नगराध्यक्ष आनारोजीन लोबो, भाजप महिला जिल्हाध्यक्षा सौ. श्वेता कोरगावकर,शिवसेना शहर प्रमुख बाबू कुडतरकर, भाजपचे शहर मंडल अध्यक्ष अजय गोंदावळे, मंदार कल्याणकर, विनोद राऊळ, मनोज नाईक,माजी नगरसेवक सुधन्वा आरेकर, हेमंत बांदेकर यांसह महायुतीचे प्रमुख पदाधिकारी उपस्थित होते.
