नागपूर : जन्मतःच अंध असलेल्या तिला तिच्या जन्मदात्यांनी जळगाव येथील रेल्वेस्टेशनच्या कचरा पेटीत टाकले. कुणाचेतरी लक्ष गेल्यानंतर त्याने तिला अनाथांचे नाथ शंकरबाबा पापळकर यांच्या वझ्झर येथील आश्रमात आणले आणि तिच्या आयुष्याला आधार मिळून जगण्याला नवी उभारी मिळाली. विषम परिस्थितीला तोंड देत जिद्दीने अभ्यास करीत तिने आज एमपीएससी परीक्षेत यश मिळवत समाजापुढे आदर्श निर्माण केला आहे. ही प्रेरणादायी कथा आहे, मालाची. ज्येष्ठ समाजसेवक शंकरबाबा पापळकर यांच्या सहकार्याने तिने हे यश प्राप्त केले आहे.
संधी आणि साधनांचा अभाव असल्याचे कारण देत अनेकजण आपल्या नशिबाला दोष देत असतात. अशांसाठी माला या २५ वर्षीय मुलीची कथा प्रेरणादायी आहे. जळगाव रेल्वे स्टेशनवर कचऱ्याच्या पेटीत सापडल्यावर शंकरबाबा पापळकर यांच्या वझ्झर येथील अनाथ आश्रमात तिने बालपण व्यतीत केले. जिद्द आणि मेहनतीच्या बळावर तिने शिक्षण सुरू ठेवले. अमरावतीमधील व्हीएमव्ही कॉलेजमधून कला शाखेची पदवी घेतली. यानंतर माला ही स्पर्धा परीक्षांच्या तयारीकडे वळली. युनिक अॅकेडमीच्या अमोल पाटील आणि प्रकाश टोपले यांच्या मार्गदर्शनात तिने एमपीएससी परीक्षेची तयारी केली… राज्य लोकसेवा आयोगाच्या ‘गट ब’ आणि ‘गट क’ पूर्व परीक्षेत तिने यश प्राप्त केले. भविष्यात राज्यसेवा परीक्षा उत्तीर्ण करायची इच्छा असल्याचे मालाने सांगितले.
शासकीय सेवेत जाऊन जनसेवा करण्याचा निर्धार मालाने व्यक्त केला आहे. मालाच्या या यशाची दखल घेत तिचा आदिवासी विकास विभागातर्फे सत्कार करण्यात आला. आदिवासी विकास विभागाचे अप्पर आयुक्त रवींद्र ठाकरे यांनी सत्कार करत तिचे कौतुक केले. अनाथ आश्रमातील वॉर्डन वर्षा काळे, मालाच्या मैत्रिणी ममता, वैशाली, पद्मा आणि शिवकुमार पापळकर यावेळी उपस्थित होते. मोबाइलवर केला अभ्यासजन्मतःच अंधत्व वाट्याला आल्याने स्पर्धा परीक्षेची तयारी करताना मालाला अनेक अडचणींचा सामना करावा लागला. तिने अभ्यासासाठी मोबाइलची मदत घेतली. दृकश्राव्य माध्यमातून तयारीवर भर दिला. संकल्पना समजण्यासाठी युट्युब व्हिडीओची मदत झाली, असे मालाने ‘मटा’शी बोलताना सांगितले. आदिवासी विकास विभागाद्वारे निर्मित महुआ लाडूने मालाच्या यशाचे स्वागत केले गेले.
